de bank
In 2019, 3x11 jaor nao de oprichting, wolle wae oos jubileejum krach biej zitte mit get blievends.
Get waat de saamhorigheid en de verbroedering van de vastelaovend mos benaodrökke. Oeteindelik kwoome wae oet op ein vastelaovesbank. In januari 2018 waas 't iërste contact mit Social Sofa, de leveranceer van de kaal bank en de mozaiksjteinkes. In juli de oetnuedigingen väör de vriejwilligers en op 25 augustes de workshop. Daonao kos 't werk beginne.
’t Ganse project waas op verbroedering gebaseerdj, ein tiëntal vriejwilligers van versjillendje Häörder (vastelaoves) verenigingen hubbe saame in ruum 450 oer de 18.000 sjteinkes gekniptj en geplektj. Op 29 november waas de bank zoea wiet klaor det de sjteinkes gevoogdj koste waere. En op 02 febrewarie 2019 zoog de bank eindelik 't daagleech, ze waerdje toen nao de definitieve plek op de Sjaopswei gebrach.
Op de bank zelf is aan de ziejkantj ’t logo van de Sjaopswei verwirktj, op de achterkantj sjteit de Sjaopswei (’t raodhoesplein) aafgebeeldj mit de kirk, ’t kiosk, cafe aan de Kirk, ’t väörmalig gemeindjehoes, oos kenon en de sjaopebössel. Op de väörkantj sjtaon de sjaöp oppe wei, gans links ein boeresjaop, aan de rechse kantj ein joekskapel sjaop, dao naeve mit de roeaj naas ’t Bacchussjaop en dao naeve ’t lemke symbool vaör de jeugdcarnaval, ’t zeen allemaol sjaopsköp (de carnavalsvereniging) die saame op de wei sjtaon.
De teks oppe bank benaodrökt de saamhorigheid, “vastelaovend maake wae saame”.
