fiëste oppe wei
En es den oeteindelik, nao 't äöpene van 't viefdje sezoen de baesems hange, de prins, jeudprinsenpaar, bacchus, boerepaar en kinjerboerepaar bekindj zeen gemaaktj en auch de residenties van dees hoeagwaerdigheids-bekleijers versierdj zeen is 't tied väör ein fiësje, ein fiësje oppe wei waal te versjtaon. Oeats begos es 't äöpene van de wei mer in de laup der tied omgeduiptj in fiëste oppe wei.
De Sjaopswei is gasthiër op dit fiësje en veurtj 't waord.
Ein fiësje det lang geleeje is ontsjtange en al väöle gedaantewisselingen haet ongergange, toet 2020 is 't thema regelmaotig gewisseldj. Wae haaje dörpsomroopers, Sinterklaos, de geist van de kiosk, eine hiëringvésser en gank zoea mer door. De boerebroelof haet ein paar jaor op riej 't paar bekindj gemaaktj tiedes 't fiësje. En vanaaf 2020 hubbe de kebuiterkes haor intraeje gedaon. Ze vertelle äóver 't wel en wee in 't Sjaopskoppe riek, veule de hoeagwaerdigheids-bekleijers ens aan de tandj en gaeve hen auch de gelaegeheid inkele sjtichdende wäörd toet de bezeukers te richten. Vast gegaeve is det de Sjaopebössel oppe wei sjteit te sjittere es 't fiëst begintj.
Zoea-es 't huertj vindj dit alles oppe kiosk plaats, boete dus, sjtraotcarnaval. Nao de toesjpraoke en 't optraeje van de joekskapel zaegentj de Bacchus 't fiëst van de vastelaovend en trektj 't gezelsjap nao binne biej café "aan de Kirk" om dao verder te fiëste.